【MiMi信箱】「工廈劏房」住唔住得過?﹗﹗

 

industrial-home-PN

主場全新欄位MiMi信箱

即日開通MiMi信箱(mimi@propnews.com.hk)

樓巿圈奇難雜症,你敢問,我敢答,MiMi瞓身幫你拆﹗

 

「街坊有問題」

「工廈房」住唔住得過?﹗﹗

「石棺藏屍」案情峰迴路轉,當全城關注箇中內情,有人突破盲點—工廈都可以住人?﹗﹗近年工廈劏房成為另類慳租恩物,呢類打正Home Office旗號招租嘅單位有價有巿,聽聞有啲仲包裝成精品劏房,專攻後生無殼族,難怪呢期多咗客問。

 

Q:租工廈住有冇伏

A:若然地契指明大廈係工業用途,業主改裝劏房出租唔駛問都知係違規,地政總署x埋屋宇署收到投訴會做嘢,業主限期內未還原單位,分分鐘被「釘契」收樓。租客知法犯法隨時一身蟻,被逼遷要臨急搵屋搬唔在講,冇喺限期內申請入屋紙,個人物品分分鐘無得留低,仲試過有單位被查封後租客訂金都收唔番呀陰公﹗

 

Q:住工廈有咩唔好先?

A:工廠區污煙瘴氣,話好住你都唔信,人身安全亦冇乜保障,皆因工廈單位好多時有危險品、易燃物庫存,通風、照明、逃生通道同消防設施同屋苑差天共地,絕對係危機四伏,送上門住等如搵自己條命仔較飛,慳咗租金,輸咗醫藥費呀﹗

 

Q唔租工廈有咩盤揀

A:熊巿樓價回,租金一樣跌足5個月,月租萬5蚊樓下嘅細碼租盤比率升到近5成。無他嘅,唔少業主寧平租莫賤賣,減租搶客益街坊,市區龍頭屋苑都劈,何況二三線盤?加上新盤入伙高峰期撞到正,將軍澳、東涌、元朗每區閒閒地幾千個租盤壓境,要租筍貨不妨就地尋寶。

 

MiMi有話兒:

有街坊話:有頭髮邊個想做癩痢?MiMi唔係講風涼話,我絕對體諒基層巿民難頂屋租,將貨就價情有可原。但唔少工廈劏房「喬妝」扮豪宅,叫租甚至同真‧住宅劏房睇齊,仍然有唔少後生仔落搭。相信好多街坊都同MiMi一樣,每日返工搏殺完「愛‧回家」。屋企最講Feel+安全感,工廈明明係搏殺嘅地方,登堂入室好難有feel,住入去連安全感都俾唔到,又點稱得上屋企呢?

分享:

Mi Mi

Mi Mi 廿年青春付託代理行業,「姐級」行頭並唔係浪得虛名。托賴熟客支持,地區薄建口碑,摸通行情脈絡,搭通街坊天地線,為人有話直說、不吐不快﹗喜逢一欄位論盡圈中世情,是非「咪咪」(秘密)當人情﹗