【母親節後檢討】語言偽術，連阿媽都識…

 

是咁的，話說尋日母親節，FB人人放閃曬溫馨，現實世界係唔少人激阿媽當食生菜，無他嘅，全天下女人一樣口不對心 (好似係)，小編醒你幾招讀心術傍身，摸清女神「真‧心嗰句」，日日都係母親節啦﹗

 

媽，我趕唔切買母親節禮物…

口嗰句：唔駛特登破費，你生性娘就心足。

心嗰句：衰囝(囡)，一年一度都慳，生舊叉燒好過生你。

 

媽，你覺得Cherry(女朋友)點呀？

口嗰句：「嗯嗯，都唔錯吖，你鍾意就得啦。」

心嗰句：「厚粉過我兼冇嚟規矩，阿囝啲眼光認真曳。」

 

媽，我今晚唔返嚟食飯…

口嗰句：「返工緊要，留番碗湯等你返嚟飲。」

心嗰句：「衰囝晚晚夜蒲當OT，當老娘傻的嗎？」

 

媽，我好享受單身…

口嗰句：「阿囡，好心你拍吓拖啦，因住嫁唔出﹗」

心嗰句：「你嫁唔出媽養你，陪多我幾年都好。」

 

媽，我哋諗住過二人世界…

口嗰句：「媽子好開通，最緊要你兩公婆開心。」

心嗰句：「六嬸個女遲來先上岸，幾時先整粒孫我抱。」

 

媽，今年公司冇出Bonus…

口嗰句：「你有錢就留番自己駛…」

心嗰句：「你有錢就俾多啲家用，好過亂咁Fing﹗」

 

媽，唔係喎，你明明乜乜乜…

口嗰句：「你冇嘢叻，駁嘴就最叻…」

心嗰句：「個衰仔轉數又幾快，似足我咁醒。」