暮煙最愛唔係劉時鎮,竟然係…

暮煙最愛唔係劉時鎮,竟然係…

(網絡圖片設計)

暮煙最愛嘅係乜?

答案:磚頭

「花無百日紅」係公仔箱不二真理,唔少藝人搵到第一桶金後另闢財路,香港明星出名愛買樓,原來韓國演藝圈亦有唔少「磚頭幫」,唔駛扯到咁遠,淨係近排熱播韓劇《太陽的後裔》入面嘅姜醫生已經係藏富於樓嘅人辦,等八通天地線嘅MiMi綜合「路邊社」消息,一次過揭曉城中星級樓王樓后﹗

 

宋慧喬

喬妹前排喺首爾三成洞買入高檔豪宅,話說市價港幣近6,000萬,據悉女神早年已經喺同區買入靚盤,今次再下一城,以阿媽名義入手豪宅,上手業主係東洋製藥前會長,證明伊人揀男友同揀磚頭一樣眼角高,唔正睇唔上眼。

 

全智賢

另一位泡菜國女神級富婆全智賢出名愛磚頭,安胎不忘「揀宅」投資。舊年5月佢同所屬公司高層合資以約2,800萬港元買入首爾三成洞別墅,連同首爾李村洞、論峴洞嘅6個物業,身家億億聲,名副其實「富媽」。

 

Rain

亞洲舞王Rain新劇《回來吧大叔》收視輸俾《太陽的後裔》,不過論投資功力,Rain哥絕對無得輸﹗佢手頭上有幾幢物業揸手,舊年沽貨賺咗成億,女友金泰希亦不遑多讓,早年喺首爾江南區購入全幢商廈收租,係地產圈嘅金童玉女。

 

張根碩

2009年憑《原來是美男》紅遍亞洲、童星出身嘅張根碩吸金力驚人,oppa買樓唔手軟,未到30歲名下已經坐擁巿值幾億嘅別墅、商廈,近年捲入逃稅風波,人氣滑落無阻美男置業雅興,轉戰東瀛後,賺yen買東京樓。

 

權相佑

「誠俊哥」權相佑草根出身,兒時居無定所,走紅後積極買樓投資脫貧,躋身樓王行列﹗呢位顧家男神唔止愛磚頭,仲有鋪改名癮,京畿道、清潭洞商廈分別取名「Rookie1129」及「Rookie819」,靈感來自大仔名、阿媽同老婆大人生日。

 

MiMi有say:

「筍盤」再定義

早前港女豪言「買樓好易,男人買唔起樓係無能力」,么中千萬男人心。無他嘅,「她經濟」崛起,女性平均收入同自置居所比率愈升愈有,財政獨立,上車獨立,供樓獨立,「筍盤」點止男人咁簡單?

 

有姊妹憤慨本土「陰盛陽衰」,恐懼成為百萬盛女其中一員。Be positive~有實力,冇男人一樣風流,同磚頭做人世,why not?﹗

分享:

Mi Mi

Mi Mi 廿年青春付託代理行業,「姐級」行頭並唔係浪得虛名。托賴熟客支持,地區薄建口碑,摸通行情脈絡,搭通街坊天地線,為人有話直說、不吐不快﹗喜逢一欄位論盡圈中世情,是非「咪咪」(秘密)當人情﹗