母親節阿媽黑面,原因係…

母親節阿媽黑面,原因係…

仲有幾日就到媽媽節﹗氹阿媽易過氹女友?少年你太年輕了,外國有調查指1/3阿媽唔滿意母親節收嘅禮物,唔想中地雷?小編以逆向思維,編制母親節送禮黑名單,勸君買禮前用1分鐘睇咗佢﹗

 

第6位 衫褲鞋

衣服係女人隱惡揚善嘅工具,具有超然地位,除非令母擁有羅霖百搭身材,否則貿然送衣服過佢,分分鐘招致衣不稱身嘅尷尬場面,罪過罪過﹗

 

第5位 LC花花煲

媽子私房菜絕對係愛回家理由,搶送LC煲冇得輸?新派港媽或者勁Buy,傳統阿娘鬧爆你「嘥嘥嘥」,然後繼續用番佢隻生鐵鑊X瓦煲,完。

 

第4位 抗皺護膚品

年齡係全天下女人嘅死穴,邊個阿媽唔想做仔女心目中嘅美魔女?你窩心地送佢妙手回春膏,等如兜口兜面話佢老,情何以堪…

 

第3位 送隻貓送隻狗

阿媽成擔心機湊大你條化骨龍,一個忽然湊多隻貓/狗,可以係情趣,可以係災難,除非佢開到口很想要,否則奉勸你出手前停一停,諗一諗。

 

第2位 毛公仔

阿媽唔係ABC港女,就算係都過咗攬公仔瞓覺嘅少女時代,你送隻兩米巨型毛公仔過佢,佢好可能贈你一句:我愛過哈囉吉蒂嗎,似乎沒有…

 

第1位 靜心口服液

小編以過來人身份作出忠告,當你發現老媽出現心煩、潮熱、汗出症狀,千祈咪懶醒買「靜心」俾媽媽,信我,你一定會後悔…

 

小編有話兒:

大時大節送禮,為人子女固然要花心思,母親大人不妨都明示或暗示一下,減低NG機會。計我話,阿囝阿囡平時孝順識do嘅,母親節送唔送禮,阿媽一樣心甜。

分享: