仲黎天價租舖 No Way

2003年沙士後,中央政府一招「自由行」將香港經濟「起死回生」,但係搞搞下,自由行嘅負面因素終於浮現,香港開始應付唔嚟。依家訪港旅客少咗,但換嚟係高昂嘅舖王租金好難頂,橋頭堡都要撤出,中小企點撐?有人辭官歸故里,有人漏夜趕科場,唔開金舖就開麵包舖,不過可以肯定嘅係,舖租高峰期已經告一段落。

 

我Mi Mi最近個舖就嚟到期,都傾緊新租約,但好彩個業主都好識趣,唔係獅子開大口,所以續租機會都好大。其實依家個樓市係咪真係咁好景,大家心中有數,但點解仲有代理行貴貴嘅舖都肯去租?歸根究底,主要咪係個市場競爭大,有些策略舖位唔可以失守外,亦都因為要擴大市場佔有率,老土啲講句「唔係你死就我亡」,唯有焗住去搶呢啲舖,明唔明智,就視乎返唔返到數,唔夠競爭力嘅只有同市場講Bye Bye。

 

仲記得97年有代理舖位嘅生意好好,有人笑言好過「賣白粉」,但今時唔同往日,要返到數,好多都係靠一手盤,前排EAA公佈9月營業詳情說明書,全港地產代理舖頭有6,441個,但係首9個月平均每個月一二手住宅再包埋非住宅嘅,都只係得6,848宗,計一計條數,平均每間舖只有1宗多少少「刁」(Deal)。

 

所以奉勸各位親愛嘅舖位業主收租唔好再咁狼死喇﹗高枱貴手,見好就收﹗

 

 

 

分享:

Mi Mi

Mi Mi 廿年青春付託代理行業,「姐級」行頭並唔係浪得虛名。托賴熟客支持,地區薄建口碑,摸通行情脈絡,搭通街坊天地線,為人有話直說、不吐不快﹗喜逢一欄位論盡圈中世情,是非「咪咪」(秘密)當人情﹗