人口萎縮 日本人食少咗吞拿魚

bkn-20160505164925704-0505_00842_001_01p

吞拿魚堪稱日本飲食文化「核心嘅內圍」,但聯合國糧食及農業組織數據顯示,日本人舊年食少咗唔少吞拿魚,國內吞拿魚供應量跌咗3%至35.3萬噸,進口量更大跌21%!

荷合分析員話,日本食少咗吞拿魚當然同人口老化兼萎縮有關,日本老人家過去係全球最大嘅海鮮消費者,大客胃口細咗,消耗量唔跌都難,更何況新一代似乎以情傾牛扒同漢堡包嘅「肉食系」居多,幫手拉低需求。厚生勞動省統計,日本肉類食用量早喺2006年已經超越海鮮,前年魚類食用量亦都較2011年少咗5%。

吞拿魚被日本人冷落亦都同全球宏觀經濟息息相關,事關國際海鮮市場用美金結算,舊年美元強勢,兌日圓升到上金融海嘯後高位,日本入口吞拿魚突然貴咗唔少,見到三文魚平,咪食少啲吞拿魚囉。

吞拿魚本來已經飽受供應過剩困擾,連日本人都唔吼,舊年價格碌落6年新低,但聯合國預期,日本人對外國吞拿魚嘅需求會繼續下跌,就算啲円今年升到呀媽唔認得都無用。

來源:on.cc東網

分享: