【必睇】買「凶宅」5件事 百無禁忌話你知

買「凶宅」5件事 百無禁忌話你知

【必睇】買「凶宅」5件事 百無禁忌話你知

樓巿激安﹗全城買家唔抵唔吼,另類筍盤—凶宅一樣有market,明嘅,筍盤險中求,唔少買家驚鬼,但仲驚買貴。MiMi醒你買凶宅5件事,祝你買得安心、住得安落﹗

 

1.凶宅難承造按揭

銀行審批按揭會考慮單位日後轉售風險,發生過大命案嘅凶宅會被列入黑名單,買家承造按揭有機會食閉門羹,唔怕一萬,成交前攪清楚借唔借到按揭,甚至預留一筆資金作FULL PAY。

 

2.陰氣重嘅唔啱住

陰宅唔係人人住得嚟,體質虛氣場弱,較易撞鬼,家有孕婦、老人、細路、長期病患都住唔過。自問後生壯健、眉高眼大兼有神,陽氣爆燈嘅朋友,可以諗諗。

 

3.換裝修化解怨氣

「凶宅」一般積累怨氣,易有磁場問題,令住客容易病或發生意外,入住前最好先嚟個大裝修,牆身、傢俱首選白色忌鮮紅,換爐頭助轉運,窗常開提升陽氣,種花養魚增添生氣。

 

4.宗教神器助定驚

曾經發生凶殺案嘅單位,要住得安心宜打齋超渡亡魂,入屋前先擇日「拜四角」,有信仰嘅宜擺放地主、十字架、聖母像等宗教物品。「無神論」嘅就咪臨急抱佛腳,弄巧反拙﹗

 

5.引陽入屋谷人氣

凶宅入伙後,最好請親朋戚友多啲上嚟坐,食飯開P為催谷人氣,尤其做紀律部隊、外型硬淨夠man,陽氣寧舍旺盛,或者開心果有助散發超強正能量,入屋有助驅散陰氣。

 

MiMi打圓場:

講到尾,住凶宅最驚撞鬼,我MiMi帶人睇樓咁耐鬼影都未見過,老土啲講句「平生不作虧心事,半夜敲門也不驚」,你見「凶宅大王」風山水起,唔愁冇人接貨,就知「同鬼住埋vs無鬼得住」邊樣得人驚啲啦﹗若然買完番嚟住得唔安落嘅,不妨「筍」啲租俾鬼佬、教徒,將價就貨啫。

 

樓巿通識:

何謂「凶宅」?

香港法律無白紙黑字列明何謂「凶宅」,坊間泛指曾經發生嚴重事故,涉及人命傷亡包括自殺、他殺、意外身亡等嘅單位。

 

屋企有人因病或年紀大過身,大部分情況單位都唔會被定義為「凶宅」。亦有部分情況,「凶宅」同層單位都被定義為「凶宅」,以98年德福花園五屍命案為例,「凶宅」同層單位樓價亦受影響,即係買入「凶宅」隔離左右單位,銀行按揭成數亦未必做得足。

 

分享:

Mi Mi

Mi Mi 廿年青春付託代理行業,「姐級」行頭並唔係浪得虛名。托賴熟客支持,地區薄建口碑,摸通行情脈絡,搭通街坊天地線,為人有話直說、不吐不快﹗喜逢一欄位論盡圈中世情,是非「咪咪」(秘密)當人情﹗