【拆彈】拆解家傭奇難雜症

【拆彈】拆解家傭奇難雜症

 

香港外傭大軍超過34萬,稱職姐姐做好呢份工,融入你家中,問題姐姐唔守規矩,一句話惹毛你全家,小編集結姐姐奇難雜症事件簿,幫你見招拆招,接彈拆彈﹗

 

家傭「(惹)毛語錄」

「太太,我想幫姊妹替工。」

近年英文討論區「Looking for part time」貼文湧現,唔少姐姐趁放假、僱主返工、少主返學等空檔期「秘撈」搵真銀,僱主咪以為一次半次、隻眼開隻眼閉唔上身,縱容自已嗰個或者請人哋個姐姐做兼職,或者都係違法,一經定罪,監都有得你坐呀。

 

「我鄉下有事,想借錢應急。」

姐姐要求你預支薪金或借錢,先攪清楚背後原因,最常見係償還中介費或突發家事,借定唔借,除咗睇借款數目,仲要衡量佢嘅還款能力,根據法例,僱主借俾姐姐嘅款項,要有佢嘅書面同意,無論你借咗幾多錢俾姐姐,每個月唔可以扣佢月薪超過25%抵債,最好簽訂契約防姐姐走數,反咬你剋扣人工。

 

「我想stay out搬出去住﹗」

聽聞舊區唐樓有所謂「姐姐私竇」嘅boarding house招租,但入境條例禁止家傭外宿,換言之姐姐一定要喺僱主住址(工作簽證申報)居住,至於姐姐每個禮拜專享一日24粒鐘嘅休息日,雖然法例冇明文規定休息日要返僱主屋企過夜,但姐姐s一般夜晚10點前後會知歸。

 

「太太,我……有咗BB。」

姐姐玉女添丁,僱主有兩個處理方法:Plan A)唔炒得;家傭同港女一樣有婦產福利,做夠40周有醫生紙可放足前4後6有薪產假,期間家務照做,但謝絕高危動作。Plan B )和平分手;如果真係唔想繼續聘用,雙方可通常透過談判解約,僱主須要賠償一個月代通知金同回程機票。

 

「先生,我no幫你揼骨啦。」

姐姐唔係「阿四」,揼骨並唔屬於家務,佢冇合約責任去做,絕對有權say no,況且按摩涉及身體接觸,過往唔少主僕風化案都係由按摩引起,無謂自製桃色陷阱。不過照顧家庭成員係家務職責,如果有殘障或癱瘓嘅屋企人須要定期伸展活動四肢,可以請姐姐代勞。

 

「有人上門收數…我以後唔敢。」(哭腔)

姐姐爭大耳窿數或幫同鄉借錢做擔保,分分鐘招惹收數哥上門,對僱主簡直係終極惹毛,除咗打999備案,最緊要摸清姐姐爭幾多街數,大額貸款意味佢可能有賭錢或不良嗜好,重犯機會大,如果真係頂唔順,可循正常途徑解僱佢。唔想繼續被騷擾?拿拿臨去入境處申請終止合約確認書,向財仔證明自己同姐姐劃清界線,以後記得收好信件同信箱匙,姐姐借財仔都冇咁易。

分享: