【轉季戒備】家居滅蟲攻防戰

家居滅蟲攻防戰

 

春天除咗為大地帶來朝氣,亦為屋企蟲蟲帶嚟生機﹗討厭﹗對付「另類室友」,我知黑旋風的確好使,但唔駛吓吓出動殺蟲水嘅,食腦就得啦,蟲蟲兵團殲滅戰,sure win﹗﹗

 

1.薯仔誘殺衣魚

衣魚最愛食澱粉質,對付呢類「吃貨」宜用美食計;將薯仔稍微磨碎放上木板做餌,擺入衣櫃、書櫃、報紙堆等衣魚老是常出現嘅位置,當佢不顧一切「鑽」入薯仔開餐,你連蟲帶薯送佢一程,快狠準﹗(幾時都話美食係糖衣陷阱)

家居滅蟲攻防戰

2.硼酸殲滅小強

殲滅宇宙最強嘅小小強,要特事特辦﹗硼酸係殺手鐧,藥房有售,將一杯仔硼酸倒入熱水攪勻,用硼酸水拖地,風乾後會喺地板形成結晶體,小強行過中毒身亡,但硼酸有毒,避免毛小孩同細蚊誤食﹗

家居滅蟲攻防戰

3.果皮當蚊香燒

唔講你一定唔知,橙皮、檸檬皮、柚子皮可以驅蚊,是咁的,曬乾後切絲放入布袋仔,天然驅蚊香包大功告成﹗再徹底啲,不妨將晒乾嘅果皮用器皿盛載,放喺屋企門口同窗邊位,當蚊香燒,防蚊入室so easy。

家居滅蟲攻防戰

4.蒜醋專治螞蟻

蟻俠嘅天敵係蒜頭﹗只要沿蟻路放粒切開嘅蒜頭,或者放兩粒切開嘅蒜頭落水拖地,螞蟻怕怕﹗若然你比螞蟻更討厭蒜味,仲有個清新之選,用醋溝水(1:2)入噴壺,專攻牆角、窗台等蟻患黑點,黑蟻又好、黃蟻都好,統統遠離你﹗

家居滅蟲攻防戰

5.冰火對付穀牛

穀牛咩嚟?白米開封放得耐,會滋生一粒粒黑色有角嘅甲蟲仔,是為穀牛,名副其實「真‧蛀米大蟲」﹗連飯食落肚無害,但夠晒嘔心,趕絕穀牛最有效嘅方法係將米鋪喺報紙上面曬太陽,或者將米放入冰箱兩三日。

家居滅蟲攻防戰

6.果皮醋趕卜泥

回南天牆身驚現無數小啡點,此蟲名為卜泥,霉菌係主要食糧,要卜泥絕跡,可以將橙皮、檸檬皮浸水一粒鐘,再加白醋抺牆。橘類果皮本身有驅蟲作用,加埋醋防霉,雙管齊下。咪以為用手撳死佢好醒,屍味會引晒佢啲絲巴打出嚟﹗

家居滅蟲攻防戰

圖片來源:www.nmplus.hk

7.矽藻土滅床蝨

床蝨咬人事件時有聽聞,一網打盡,要出真功夫。關好房門窗,放艾條入鐵罐火燒,煙燻睡房幾粒鐘。醒多個「超必」過你,直接將矽藻土粉撒喺蝨患位置,殺蝨不求人﹗矽藻土人畜無害,但粉末容易滿天飛,用嘅時候記得戴口罩、眼罩。

家居滅蟲攻防戰

8.肉桂噴霧殺蟎

塵蟎最憎肉桂味,用酒精x肉桂調製「肉桂噴霧」,狙擊床褥、被鋪、衣櫃等重災區,用手拍兩拍,塵蟎一網打盡。一不做,二不休,將床單、被套、枕頭套等用60℃熱水洗乾洗淨,建議每星期攞出去曬太陽,塵蟎想翻生都幾難。

家居滅蟲攻防戰

小編有Say:

蛇蟲鼠蟻不可怕,可怕嘅係佢哋唔覺意做咗播菌元兇,對家人健康影響可大可小﹗滅蟲行動係長期怔戰,平時攪好啲家居衛生,有蟲滅蟲,冇蟲防蟲,點都好過臨急抱佛腳大開殺戒﹗講開又講,衛生程度反映國民質素,香港人向來以「有質素」自居,當大家出街乾淨斯文,屋企係咪一樣見得人?

分享: