瑞士公投「全民派錢近2萬元」 點解反對？

香港討論緊「全民退保」之際，瑞士就討論緊「全民派錢」，即係唔使做任何事，成人無條件每月可獲派2,500瑞郎(約1.95萬港元)，小童則可獲派1/4，以取代部分福利，瑞士將於6月5日就呢項議題進行公投。真係聽見都心動，不過定啲嚟，因為呢項動議不太可能落實。

其實，在瑞士直接民主體制中，每年都會有幾次公投。今次嘅「全民最低收入保障」在得到所需要嘅10萬個簽名便能動議，但民意調查顯示，動議難以再得到更多支持票。以4月份一項民調為例，高達72%受訪者反對動議，僅24%支持，餘下4%沒有意見。

事實上，瑞士生活成本高昂，即使每月獲派2,500瑞郎，即每年獲30,000瑞郎，仍只係僅僅高於2014年嘅貧窮線29,501瑞郎。統計數字顯示，當地2014年約每8個人就有1個生活於貧窮線以下，65歲以上長者更有1/5屬於貧窮。

支持動議嘅人包括希臘前財長瓦魯法基斯，佢就話，隨着自動化和機械人取代嘅職位愈來愈多，有需要為人們提供最低收入保障，而好似瑞士呢類富裕國家，就可以趁呢個大好機會嘗試進行呢項實驗。瑞士政府方面當然反對動議，認為此舉等同要加稅，而且會導致人們不願工作及引致技術短缺。

來源：on.cc東網