業主自衛術 7招KO「租霸」

十個香港人有九個發夢50歲退休，有樓收租養老，你以為包租公惡晒？Sorry﹗宇宙最強都有天敵，所謂爛佬怕潑婦，業主怕「租霸」，唔想引狼入室，貼屋俾人住？袋實呢7招就天下無敵啦﹗

1.高登仔上身
簽訂租約前，盡量起清租客底，身份証、糧單要睇齊，順手印多份copy留底，認真啲，不妨打電話去佢公司，一試就知係咪古域仔﹗

2.租霸照妖鏡
如果你發現個租客相當有嫌疑，可以向「業主會」調查，唔少「業主會」有「租霸」名單，只要上網input個名或者ID 冧巴，「租霸」即刻現形。

3.轉移綜緩金
如果租客拎緊綜緩，對佢仁慈唔代表要對自己殘忍，建議要求佢簽署份協議，同意社署將租金津貼，直接過數去你戶口，萬一佢say no，仲有追租絕招—向社署舉報。

4.認錢唔認人
租客交訂，「一手交錢，一手交匙」係真理。事關唔少「租霸」精甩尾，專門揀傍晚、週末交支票，當天真嘅你交低鎖匙後至發現係空頭支票，「霸哥」已經登堂入室（阿門），有早知冇乞兒，我係你不妨按金收得「狼死」啲打個底，中伏都冇咁傷…

5.搵外援收樓
業主簽妥租約後，記得要交CR109「業主與租客(綜合)條例-第IV部新租出或重訂協議通知書」，事關法庭唔受理租務糾紛，租客欠租超過15日，業主可以向土地審裁處提出收樓，一般3至4個月就可以收返層樓，對付神級「租霸」要出「超必」，搵執達吏幫拖掃佢出門口。

6.租霸「Bupa」
若然你租樓租到囉囉攣，話說巿面上有「防租霸保險」，可以就法律支出、欠租、第三者傷亡或財物損毀等法律責任索償，買完終於有覺好瞓。

7.有圖有真相
業主租屋前，記得幫愛居影番輯寫真做記錄，要求租客退租時，跟足張相，將單位還原靚靚。如果單位連電器出租，就要額外列出家電清單，避免出現租樓羅生門。