元宵救急 4招簡易家居佈置旺桃花

下星期一2月22日正月十五係元宵佳節，即係中國情人節，連日期都成雙成對放閃光彈，試問一眾「毒男」、「宅女」點算好？想破「毒」而出，趁仲有時間，善用以下4招旺桃花簡易家居佈置，話唔定即刻有人約。唔好以為風水旺桃花好複雜，風水專家建議，只要多利用開運居家小擺設，轉個手就可為平淡生活帶來新轉機。

愛情和風水，本來就很簡單。

第1招：情來自有…東南方

搵啱方位，愛情自然來。猴年「桃花位」大利東南，如果你家大門開係東南方，恭喜晒﹗桃花臨門，今年的人緣、愛情都會非常順利。此外，如果睡房或灶頭都位於東南，亦有利人緣及愛情運。

第2招：谷出真愛

只要輕輕一谷，愛情就會來敲門。唔好誤會，講既係愛情運。如果「門、房、灶」都不是位於「桃花位」，都唔代表猴年繼續孤「毒」，可以係東南方擺放一些旺桃花的物件，例如魚缸、紅地毯、鮮花、粉色水晶之類，谷起桃花運勢。不過，切忌擺放仙人掌，因為傳統風水學之中，仙人掌有「斬桃花」的作用，大婆用來防小三就得，對單身人士卻是大忌。此外，如果於桃花位放置花卉，花一凋謝就要即刻更換，養花的水更萬萬不能有臭味，否則會帶來反效果。

第3招：愛情源自牡丹花

好多人只知道桃花利愛情，其實牡丹一樣有效果。單身的毒男宅女，可以在房間種牡丹，甚至簡單擺返幅牡丹圖，吸收牡丹的氣勢和氣質，亦可以增加吸引力。

第4招：玄關照亮愛情路

玄關即係門口到大廳連接的地方，想增強桃花運，玄關的燈光一定要明亮，亦要保持乾淨整潔，月老先會來敲門。吓﹗門口裝盞燈就有拖拍？愛情來的時候就是咁簡單。