豪宅搶風頭 「任性哥」忍手定出手？

所謂風水輪流轉，那些年，中小型樓係升巿火車頭，遇上加息「熊出沒」，眨吓眼變減風源頭，忍唔住講句「升也樓仔，跌也樓仔」，而舊年受大巿影響狀態反覆嘅豪宅巿，懶理全城減減減，春節前密密放閃。

有料就是任性，一班實力與智慧兼備嘅「任性哥」，係時候為buying list 2016高瞻遠矚。究竟豪宅夠唔夠腰力企硬？識得揀可以點樣揀？

時勢唔同，知己知彼，即刻幫朕check吓2016「真‧豪宅」到底要符合咩package。除咗山頂、南區、淺水灣經典地段，近年九龍站新貴輩出——漾日居、擎天半島、凱旋門，粒粒皆星；銀碼方面，家陣2,000至5,000萬係基本程度，5,000萬以上至係豪中之霸，今年絕對係呢類超級豪宅睇高一線，除非唔係。

有咩根據？物以罕為貴。估計嚟緊幾年超級豪宅新供應佔整體新樓供應不足1%，截至舊年底，獨立屋亦僅僅佔全港私人單位總存量唔夠2%，換句話，呢類豪宅巨無霸新嘅唔憂賣，舊嘅仍然矜貴。劈價？諗多咗。