【估你唔到】女星唔鬥騎樓，鬥呢樣…

「G1格鬥會」女星打出真火，有幾奇？女人天性愛鬥大，女星鬥顏值、鬥身材、鬥人氣？Out﹗港圈潛伏唔少隱形樓后，唔鬥騎樓鬥買樓﹗

DaDa o靚模變樓后
由o靚模升呢金像獎最佳女配角嘅DaDa，有身材兼有腦！多得精明老媽教路，買樓抗通脹，出道冇耐已經做業主，樓換樓賺smart money，轉手泓景臺單位袋百幾萬不特止，仲榮升索爆包租婆，近日小妮子芳蹤再現地產舖，睇嚟彈藥就緒，趁低吸納。

區文詩 有樓唔憂嫁
Cookies餅碎區文詩雖然幕前減產，幕後不失精彩，皆因自細跟老爸學炒樓，先後入手兩層樓，幾年前400幾萬買入奧城‧西岸單位收租，後來轉戰投資日本樓，30歲前上車目標超額完成，近排現身跑馬地密密睇樓，擺明車馬添食，眼見姊妹輪住嫁，伊人高呼只愛磚頭唔恨嫁﹗

楊思琦  單親「樓」後路
思琦妹由村屋港姐到花旦，失婚後獨力湊女，除咗靠密密接job，慳妹仲唔愛名牌愛磚頭，暗地裏有幾個物業揸手，泓景臺、麗港城、天晉…靚媽揀樓但求就腳，方便返工拚命。明嘅！藝人收入唔穩定，男人又未必信得過，買樓保本，對自己、對屋企多個保障，最緊要努力搵銀供樓啫﹗

肥媽 兩萬首期致富
有6個仔女嘅肥媽，生得﹗唱很！煮得﹗投資物業一樣得﹗肥媽揀樓同揀老公一樣「無國界」，中、港、馬來西亞、英國遍地開花，近年更染指工廈、商舖。話說肥媽早喺酒廊歌手時代，以一成兩萬首期買入金獅花園單位，之後細屋換大屋，踏上富媽之路。

薛家燕 樓壇老江湖
「有錢一定買磚頭」係家燕媽媽嘅名言，佢手頭物業橫跨港九，涉獵住宅、工廈、商舖，絕對係地產界老手。原來家燕喺80年代已經開始炒樓，高峰期幾年操十幾個盤，賺近半億，諗起都和味，但上得山多少不免損手，家燕總結經驗：買樓忌心急，無論幾忙都要睇過先買。

MiMi心嗰句：

一地「筍盤」淑女好求！

曾幾何時，買樓係男人專利，世界變，今日女人愛儲磚頭。

早前就有港女豪言「買樓易，男人買唔起係無能」，么中千萬港男心。無他嘅，近年女人撐起半邊天，「她經濟」崛起，女性消費力抬頭，自置私樓比率由2006年16.9%升至2011年17.4%，反而同期男性比率由23.4%跌到17.8%，姊妹心頭好自己錢買，難免助長大口氣！

另一邊箱，有姊妹憤慨本土陰盛陽衰，恐懼加入百萬盛女大軍。Come on！幸福靠自己爭取，有實力就有風流，MiMi眼中「筍盤」一地都係，同有質素嘅磚頭做人世，夠晒安全感，why not？﹗