【奇聞】香港Top 5「鬼地方」(膽小慎入﹗)

 

上期講「凶宅」，唔少讀者又要驚又要睇，今日MiMi徇眾要求，地區猛料繼續出爐—香港Top 5「鬼地方」，自問地膽嘅你聽過未？

 

第五位：天后「坑渠鬼仔」

大坑皇仁書院側有條明渠，60年代未建行人道前，街坊鋪建木板過坑渠，一次大雨山洪暴發，將坑渠入面玩緊嘅細路s沖走，「鬼掹腳」奇談從此流傳：夜晚過坑渠隨時會俾「青BB」鬼仔拉落水，受害人唔止聽見細路恥笑聲，腳面仲留有瘀痕，當年呢個坑渠奇談傳到沸沸揚揚，自從政府蓋建行人路代替木板路，怪聞就Let it go~

圖片來源：www.wikiwand.com

 

第四位：大埔「猛鬼橋」

松仔園係大埔滘自然教育徑其中一個起步點，傳聞當年有班學生去嗰度旅行，無啦啦落大雨，老師帶學生匿埋喺橋低避雨，結果山洪暴發，師生被沖走，造成約30人罹難嘅慘劇，從此松仔園又名「猛鬼橋」，怪聞接二連三，有人過橋話望到細路揮手，有司機夜晚驚見細路截車，行山友話知你，週末漫步四色林徑，一家大細踩單車尋蝶。

圖片來源：zh.wikipedia.org

 

第三位：大埔「運頭塘」

以下又係一個屬於大埔友嘅鬼故。從前，日本侵佔時期，好多人被斬頭，「死人頭」多到刑場放唔晒，每日由工人用木頭車運去荒山野嶺埋葬，而運頭塘村就係「人頭物流」必經之地，有街坊話入夜時，聽到木頭車經過嘅聲，仲有一排排無頭鬼跟住木頭車行…今時今日呢度一樣多人頭，臨近港鐵站嘅「運頭塘」旺丁旺財，人氣咁盛，鬼都怕啦。

圖片來源：zh.wikipedia.org

 

第二位：西營盤 「高街鬼屋」

西營盤高街有座1892年落成嘅精神病院，坊間流傳二戰香港淪陷，日軍曾以此做刑場，呢幢神秘大樓被空置多年，話說不時傳出撞擊慘聲，嚇到路人甲巧驚驚。「高街鬼屋」之所以響朵，除咗靠鬧鬼傳說，仲有呢度嘅優雅建築，拱形遊廊x花崗石氣質獨特，吸引唔少電影就地取景，上年10月「升呢」做法定古蹟，港青「呃Like」又一好地方。

圖片來源：www.heritage.gov.hk

 

第一位：屏山「靈異校園」

呢間停辦咗十幾年嘅達德學校(小學)，2013年被外國勢力—《國家地理頻道》評選為全亞洲十大恐怖地方之一，名符其實為港爭光﹗話說學校前身係亂葬崗，安置抗戰村民屍首，另一個版本係一位前校長著紅衫喺女廁吊頸自殺，鬧鬼傳聞令呢個場變身冒險勝地，早年有班中學生擅闖學校探險，其中有人行為怪異疑似撞邪，最後要打999。有歷史教授話無明文資料記載呢度係亂葬崗，都係嗰句，鬼故嘅嘢信不信由你。

圖片來源：www.fso-createhk.gov.hk

 

「鬼故」通識：

鬼故，係一種同靈異事件有關嘅故仔，口耳相傳，造成另類流行文化，當中唔少係著名嘅都巿傳奇，基於其戲劇性，鬼故成為電影、話劇嘅重要題材。(參考維基百科註釋)

 

MiMi打圓場：

MiMi破格講鬼故，嚇人為名，八卦為實，有怪莫怪﹗講到底，有人嘅地方就有故仔，「鬼地方」奇聞由街坊人傳人傳播，有冇發生唔係重點，最重要係每個故仔背後都盛載住嗰區獨有嘅歷史背景，風土人情，糅合唔同年代香港仔嘅承傳同創意，係屬於你同我嘅集體回憶，可惜香港人出名善忘，呢類港產鬼故有幾多個你聽過？計我話，港產鬼故直頭應該納入非物質文化遺產，受到政府保護同承傳，梁特首不妨諗諗佢﹗(爛gag嚟㗎)