【爆﹗】翠如、坤哥神話背後，原來係靠…

以下係一個勵志故事。

邊個話住公屋一定俾外母沒收雞肶？邊個話住公屋等同廢青？「翠如BB」灰姑娘變千金，「偽毒坤」草根變男神，公屋傳奇點止呢兩個？肥仔同屋邨仔一樣係潛力股，今期富貴公屋大起底，以下有冇一條邨你住過？

恒安邨

星級住戶：黃翠如、容祖兒、楊怡、王祖藍

位置：馬鞍山

興建年份：1987年

座數：7

單位總數：1,319（不包括已於租者置其屋計劃出售的單位）
單位面積：457至684平方呎

大台劇迷對恒安邨寧舍有親切感，皆因《大時代》喺呢度取景，呢度除咗係方展博屋企，現實中亦有唔少紅星由細住到大，天后祖兒、視后楊怡、笑匠王祖藍，統統此邨出品，名副其實人傑地靈，最近舊街坊翠如父女一夜暴發，恒安狀元又添一人，富爸爸眼明快手，一早將風水屋私有化，唔知住附近嘅你，有冇撞見過佢哋？

相片來源：香港房屋委員會網站

沙角邨

星級住戶：黃宗澤、吳千語

地點：沙田圍

興建年份：1980年

座數：7

單位總數：6,400

單位面積：118至731平方呎

MiMi一講起沙角邨就流口水，皆因邨內以風味十足嘅大牌檔響朵，唔講唔知，林峰七愛嘅千語BB都係沙角邨大，聞說吳爸曾經喺邨內燒臘檔斬叉燒，認真估你唔到﹗另一位舊街坊係鑽石王老五黃宗澤，雖然Bosco一手磚頭，但出名感情豐富嘅佢對沙角邨難捨難離，由老媽子守住呢間「升呢屋」。無他嘅，沙角邨出名聚財，話說呢度之前有座「風水山」，村民相信可以阻擋錢財外流。

相片來源：香港房屋委員會網站

華富邨

星級住戶：黃仁龍、沈嘉偉、文雋、韋家輝、周華健、黎燕珊、寇鴻萍、譚小環、阮小儀、王貽興、藍奕邦、李家聲

地點：薄扶林

興建年份：1967年

座數：12

單位總數：4,800

單位面積：305至393平方呎

坐落南區嘅華富邨有平民豪宅美譽，想當年破天荒以巿鎮格調登場，屋邨首創獨立商場、人車分隔規劃，是為當代創舉，而最恨死隔嚟貝沙灣住戶嘅，係部份單位附送廉租海景，難怪盛產淑女才俊，亞姐黎燕珊、港姐寇鴻萍、譚小環都係呢度長大，不折不扣美女搖籃，每逢假日名人子弟衣錦榮歸，滿城盡泊BMW, Audi、Benz，媲美豪宅區，蔚為奇觀﹗

相片來源：電影服務統籌科網站

彩虹邨

星級住戶：楊貫一、鄭經翰、陳家強

地點：黃大仙區牛池灣

興建年份：1962至1964年

座數：11

單位總數：7,400

單位面積：230至745平方呎

彩虹邨以七彩通花磚外牆命名，成為經典公屋嘅標誌，歷年唔少外國貴賓好似前美國總統尼克遜、英國瑪嘉烈公主、雅麗珊郡主慕名出巡，咪話唔威水，唔知屋邨係咪積聚靈氣，名廚楊貫一、名嘴鄭經翰、現任財經事務及庫務局局長陳家強等才子，咁啱都係來自彩虹！

相片來源：香港房屋委員會網站

馬坑邨

星級住戶：藍潔瑛

地點：南區赤柱馬坑

興建年份：1993及2000年

座數：5

單位總數：900

單位面積：183至565平方呎

坐落赤柱遊客區嘅馬坑邨依山傍水，簡直係平民嘅世外桃園！屋邨以和諧式設計，每幢只有4至10層，真·低密度住宅，部分住戶坐擁山景海景，歷史古蹟、陽光海灘、異國食店垂手可得，連返屋企都似足渡假，重點係廉租，唔怪得那些年靚絕五台山嘅藍潔瑛都喺度落地生根。

 

MiMi有話兒：

公屋富戶高抬貴手 退租積德

香港現時有逾73萬個公屋戶，公營房屋規模全球數一數二， MiMi同唔少百萬「A準」、富貴業主一樣屋邨出身，英雄莫問出處，唔靠「父幹」靠「實幹」一樣有出頭。公屋有人爭，輪候申請迫近30萬新高，當中新登記4成係學生哥，唔少人鬧爆廢青唔上進，MiMi覺得更值得關注嘅係公屋富戶，香港人信風水，發迹公屋唔願轉手，須知道公屋分配係此消彼長嘅「零和遊戲」，富戶生人霸死地，變相阻住有真‧需求嘅朋友上樓，鑄成「朱門酒肉臭，路有凍死骨」惡性循環。MiMi建議有本事嘅富戶不妨買樓上車，將這些機會留俾有需要嘅朋友，等公屋價值代代相傳。