【神奇】10大不可不知家事偏方

 

家居難題不時來襲，民間神奇偏方多籮籮，邊啲至信得過？小編從中精選，唔駛勞師動眾嘅，隨手拎得起嘅尋常小物，瞬間變身家居急救魔術手﹗

 

Q：踩香口膠怎麼辦？

A：用冰去香口膠跡

相信冇乜人未試過踩中香口膠，冷靜啲﹗返屋企起跡話咁易，將冰粒放喺香口膠面30分鐘，等佢「乾硬化」，成塊膠搣得甩。

 

Q：波鞋發臭怎麼辦？

A：抹酒精去除鞋臭

天氣開始暖，又係時候面對鞋櫃發臭問題，每次出完街返屋企，用棉花沾些少酒精抹鞋籠鞋墊，臭味就會隨酒精揮發。

Q：心急解凍怎麼辦？

A：冰鮮肉用鹽解凍

啱啱喺雪櫃拎出嚟嘅冰鮮肉，心急想加速解凍？最科學嘅方法係灑鹽上肉面，當中嘅礦物質會加快冰粒溶化，又唔破壞肉質同營養。

 

Q：打爛玻璃怎麼辦？

A：方包收拾玻璃碎

打爛杯碟最討厭係掃極唔清又睇佢唔到嘅玻璃碎，呢個時候你只須要一片方包，佢嘅黏性輕易將玻璃碎一網吸盡。

Q：鮮花易謝怎麼辦？

A：啤酒延長鮮花期

屋企插花最緊要襟擺，秘方係喺花樽水入面加啤酒，除咗酒精令花枝切口防腐，啤酒內含營養亦為鮮花提供養份。

 

Q：衣服噏臭怎麼辦？

A：白醋辟衣服噏味

回南天洗衫唔乾最易滋生霉菌，散發難聞噏味，弱酸性嘅白醋係剎菌神器，開洗衣機加150-200cc白醋一起洗，當堂fresh晒。

 

Q：煲湯太鹹怎麼辦？

A：薯仔吸湯中鹽份

煲湯落鹽重手咗，唔想嘥心機？薯仔係急救秘技，切幾塊放湯煮幾分鐘，薯仔可以吸收多餘鹽分，用完即棄，即刻幫你還原靚湯。

 

Q：頑固油污怎麼辦？

A：梳打粉油跡剋星

秒殺廚房頑固油污，梳打粉係最佳拍檔，一湯匙梳打粉溝半杯熱水，攪勻後直接搽喺油跡面等15分鐘，污跡一抹「拜拜」。

 

Q：煎燶鑊怎麼辦？

A：洋蔥煲水甩鑊燶

入廚最災難莫過於煎燶鑊，用洋蔥加水煲，可以將炭化物分離，鑊燶自動軟化浮面，連洗潔精都慳番，菠蘿皮有同樣妙效。

Q：碗碟洗極仲油怎麼辦？

A：茶包係吸油魔師

煮完重口味菜，碗碟洗極仲係油淋淋，點解救？茶包嘅單寧酸同洗米水嘅澱粉質係去油魔師，加落水洗碗既環保又唔傷手。