【10大】全港最乜乜乜街巿

 

行街巿係C9專利？少年你太年輕了，街巿卧虎藏龍，代表唔同嘅地道文化，識貨嘅分分鐘執到寶，今期搜羅「全港街巿之最」，以下Top 10你幫襯過邊個？

 

最古董街市

位於中環嘅嘉咸街街市原來已經160歲，堪稱街巿中嘅「人瑞」，狹窄斜路擺滿乾濕檔，lunch time雲集西裝友、OL粉絲，曾幾何時呢度係經典嘅港式風景，可惜隨著巿建重建，逃唔過被消失嘅命運。(阿門)

 

最豪裝街市

大埔墟街市建築設計新穎，環境寬敞有冷氣，賣點係內設全港最大熟食中心，全場約1萬2千平方米，有近40個熟食檔兼老牌著名食店，年中唔少外區吃貨慕名潮聖，話晒耗資2億5千萬興建，有質素好合理吖﹗

相片來源：電影服務統籌科網站

最星味街市

要野生捕獲發哥，識得去一定去九龍城街市﹗話說呢度一共有581個攤檔，係全港最巨型街市之一，除咗專賣泰國食品嘅舖頭，仲有唔少高質食材，絕對卧虎藏龍，唔怪得發哥、蔡生都愛嚟呢度買靚餸。

 

最福建style街市

北角春秧街街市有「小福建」之稱，呢度有齊各式「福建style」嘅雜貨店，買家鄉菜食材呢度夠晒集中，最過癮係買買吓餸仲會有電車從中穿過，「叮叮叮」出懷舊風味，造就人車爭路街巿奇景。

圖片來源：discoverhongkong

最先進街市

領展斥資2,500萬翻新小西灣街市，以「本灣街市」新朵改頭換面登場，新潮燈箱取代傳統招牌，大部份檔口用八達通俾錢，加埋24小時水果自動販賣機同「i-Chicken」視像揀雞，絕對係我城最新潮街市。

最荒蕪街市

荃灣荃景圍係空置率最高嘅街市，話說呢個場十檔九空，靜過圖書館，烏蠅多過人…街坊寧願搭程車幫趁眾安街街巿，起碼有番啲人氣，搞成咁都係怪食環署限制多多兼管理不善囉（應該係）。

 

最「老臨」街市

臨時，對一般人嚟講係短暫嘅代名詞，直至一個街巿改寫定義。從前，尖沙嘴北京道有個紅磚建築街市，99年被拆卸起樓，原本嘅檔販被迫搬遷去海防道臨時街市，眨吓眼就「臨時」咗37年，成為老臨街巿中嘅old pat pat！

 

最神秘街市

要數本土最「山旮旯」街巿，非邊境沙頭角街巿莫屬，雖則政府已經局部性開放禁區，但唔少人到此一遊，仲係要申請禁區紙，山長水遠入到去普通街市一個，檔販唔多，勝在有個熟食市場，多數食肆4點後收枱，食好東西要趁早。

 

最多「米奇」街市

柴灣街市係著名嘅老鼠天堂，傳說午夜12點後，過百隻「米奇」開派對，墟冚過迪迪尼樂園，諗起嚇到心都離一離，街坊一邊鬧爆食環署滅鼠無能，一邊局住幫襯，唯有買完餸洗乾淨、煮熟啲至入口。

 

最平價街巿

工聯會今年首季「兩餸一湯指數」新鮮出爐，購買同樣食材，觀塘瑞和街街市最平。呢個場出名貨多價抵迫人，露天街巿一條街X4層街巿大樓，舖位用到盡，白底紅字膠招牌、地道手寫價錢牌，街坊就係愛呢陣人情味﹗