5個「小習慣」 慳皮救地球

嘥，水費嘥；嘥嘥嘥；嘥，Watt數嘥，成日亂咁嘥…典解小編咁好唱口？之咪係響應世界地球日講環保。小編都係香港人，知道大家最怕麻煩，開心share 5個零成本、低難度嘅家居小習慣，幫你慳住荷包錫住地球！

1.如何平嘆冷氣？

最近天氣又濕又暖，唔少人已經偷步開冷氣，唔想未到夏天電費已經超標？開冷氣機之餘開埋電風扇，可以加速冷空氣循環，製冷效果事半功倍，以冷氣機每較高攝氏一度即慳1/10電計，每個月慳幾十蚊電費不是夢。

2.雪櫃如何慳電？

係人都知雪櫃係吸電「巨無霸」，要減低食電量，除咗將佢安置喺至陰至涼之地，以免影響散熱性能，雪櫃背同牆身最少要預留10cm距離，櫃頂謝絕雜物，咁就唔會增加用電量，雪櫃都換少幾個。

3.煮餸如何慳火？

靚太「打斧頭」唔一定靠街巿「買平啲」，換個煮法幫你慳唔少，焗爐最少用2,500W電，烹調時間一般亦較長，不妨改用微波爐或明火煮，炒菜一樣有得慳，蘿白、芥蘭根莖類難熟，用水灼過先炒，快靚正﹗

4.如何慳住洗衫？

污糟衫攤開至入機，唔用熱水改凍水模式洗，將耗電量減到最低。平均一至兩個月幫洗衣機大掃除，方法好簡單，倒半杯漱口水入機，完成一次洗衫程序就攪掂，洗完衫不妨以晾乾取代乾衣機，每次最少慳1度電。

5.識慳由沖涼開始？

話說沖涼係港人家居最嘥水嘅活動，每次平均用10分鐘，花成100公升水，爽手啲5分鐘攪掂，戒埋長開花灑習慣，每人每年慳水超過8,000公升。用儲水式熱水爐嘅朋友，全家人輪住沖，唔駛吓吓reheat，水電一齊慳。

6.何謂「真‧熄機」？

香港人出名貪方便，返屋企黐住梳化唔願郁，客廳影音家電如電視機、Hi-Fi，慣性用完用遙控器熄機，電器變相長期處於「待機」狀態，電費不經不覺溜走，其實只要行多幾步徹底關閉開關掣，輕鬆慳番幾十蚊電費。

關你咩事：

小編犯咗一個全香港「絲巴打」都會犯嘅錯—虛偽，口裏說地球地球我愛你，身體卻很誠實地浪費天然資源。話說港人每日人均家居用水量較全球高出3成，唔止係「嘥水怪」，仲係「食電獸」，每年人均用電量約6,000度，係世界人均用電量兩倍有多，洗腳唔抹腳程度可想而知。唔想變「大嘥鬼」，成為毁滅地球嘅幫凶，同小編一齊搣甩日常壞習慣，開洗衣機、開冷氣前停一停，諗一諗，多多益善啦喂。