【初哥必讀】夾租8件事

同老友夾份租樓，享受真‧自由，係唔少廢青嘅夢想…但現實係相見好，同住難，夾租入門8件事，初哥一定要知。

真面目開心見誠

有啲習慣，要生得你出嘅阿媽至忍到，勉強冇幸福，奉勸租友s展開同居生活前，攝高枕頭理性考慮，如果對方有祼睡癖好、嚴重煙癮、麻雀癮、香港腳…你臨陣「悔租」都嚟得切喎。

孖住搵樓有商量
租友s喺租盤地段、間隔、筆直等方面各有取態，你唔係佢肚入面條蟲，自己揸旗、先斬後奏係死穴，事前要點對點攞共識，忙極都要夾時間孖住睇樓，避免錯摸傷和氣。

約法三章防走租
租屋最忌錢銀轇轕，唔想因財失義，幾深交都要先小人後君子，租金、水電媒、管理費、雜費點Pay？三口六面傾掂數，習低每期交易記錄，拗數？No Way﹗

做家務人人有責

冇老媽子貼身服侍，家務係租友s要克服嘅頭號問題，唔想與垃圾同居？同室租友約法三章做家務，唔Work？下載家務App或者鐘點姐姐求助啦。

約法三章防廁霸

人有三急，廁所就係上帝，簡單嘅沖涼、執樣、大小二事，隨時引發租友s世界大戰，建議訂立繁忙時間公廁使用公約，狙擊同居廁霸。

有客到事先張揚

引豬朋狗友入室，攜情人共度春宵好平常？咪忘記你得半個主場，唔想將自己嘅過癮建築喺租友痛苦之上，事前問準佢Yes or No係基本嘢，仲要識睇佢眉頭眼額，皆因介唔介意呢家嘢，通常口裏說不…

晚間嘈音定指引

若然你室友係夜鬼而你唔係，為捍衛個人睡眠質素，建議制定晚間嘈音限制，過12p.m.打機、煲劇、吹頭？現在已經係夜深，請將音量收細，多謝合作。