回南天早到 家居防潮抗濕攻防戰

「大寒」話口未完，「立春」等緊你，春天為大地帶嚟雨水，每年最難頂係呢個時期，天花詭異滲水，衫褲離奇唔乾，傢俬濕都不思議起霧，間屋「濕到病」。闊佬懶理？分分鐘發霉嚇死你。SOS﹗家居點對點急救，吸濕法寶急急如律令﹗

急救傢俱

木、布、皮製傢俬受潮好濕滯，勤用乾廚紙或纖維布擦乾表面水氣，一日抹一鑊，霉菌遠離我。

急救衣櫃及鞋櫃

樟木、竹炭係衫櫃好朋友，防臭、防霉、防蟲，一次過滿足三個願望。鞋籠放埋報紙，濕氣異味無得留低。

急救牆身

發現牆身天花出水，拿拿臨用布吸乾，驚現可惡嘅霉點？加啲啲酒精或1比99漂白水，一抹就bye bye。

急救地板

加些少鹽入熱水拖地，可以加速水份揮發，用埋纖維地拖，吸水力沒有最強、只有更強﹗

急救廁所

回南天廁所禁室培菌，浴缸膠邊現霉點，討厭﹗用棉花吸滿漂白水，敷一段時間，KO霉點唔駛用劍。

急救廚房

焗爐、微波爐，最易成為霉菌溫床，crossover埋油漬，望多兩眼都想嘔，有解救﹗梳打粉X白醋，加水稀釋，用布拭擦，殺菌去漬無難度。

全屋急救

黃霉天，抽濕機係無得輸嘅「鎮濕」神器，大前提係要用啱方法，記住關好門窗，免得濕氣左手去右手嚟，茶葉渣、咖啡渣唔好嘥，D.I.Y慳家防潮包，分分鐘勁過吸濕大笨象。