【抗疫】流感高峰殺到 防疫出超必﹗
最近天氣無定向，濕寒交迫，流感高峰期來勢洶洶，難怪高局長都響警鐘，叫大家醒醒定定。新年流流唔想中招？除咗打疫苗同洗手、洗手、洗手以外，仲有咩殺手鐧？
- 空氣流通
流感病毒主要經飛沫傳播，廢話？未講完，室內空氣唔流通，一個乞嚏噴射出嘅病毒可以喺空氣飄浮8至10分鐘，病毒濃度高咗，即係中招風險高咗，幾時都話，保持空氣流通係減低病毒擴散嘅不二防線。
- 注意衛生
世界上最污穢嘅可能係我同你對手，周圍摸、捽鼻哥，後果可以very unbelievable﹗除咗勤洗手，殺菌濕紙巾同酒精搓手液常跟身是常識吧。手機、keyboard係細菌天堂，閒時用酒精抹一抹，趕絕病毒唔留手。
- 瞓8粒鐘
天下間有一種幸福叫「自然醒」，現實世界？你懂的﹗原來「搵周公」係增強免疫力嘅途徑之一，有研究指，每日瞓少過7粒鐘，患感冒風險會高一倍，其實只要日日叉足電，想打敗仗都難啦。
- 經常漱口
所謂病從口入，最簡單直接嘅方法降低感冒機率，就係勤漱口，仲要係隨便開水龍頭用自來水嘅效果最好，原因好簡單，多謝政府喺自來水添加咗氟，有助口腔殺菌，大前題係啲水冇鉛。
- 食得天然
罐頭、醃肉等頹食食得多，有機會吸收過量鹽、糖、防腐劑，唔生cancer都變潺仔，流感病毒話咁易KO你。識得食梗係食天然，全麥包、糙米、新鮮蔬果，維他命應有則有，幫你抵抗力增值，做個抗毒強人。
- 薑椒驅寒
除咗板藍根、盲搶鹽抗沙士外，坊間流傳唔少抗流感偏方，姨媽姑姐話食生薑、胡椒可以驅寒，千祈唔好人試你試，要注意體質，「寒底」人適合溫性食物，適量可暖胃，「熱底」反而適合養陰清熱食物，清補涼係prefect match。
- 蔥蒜防疫
唔少人怕食蔥蒜，怕招致口氣，其實從中醫角度，呢兩款食物能夠提升陽氣，對抑制病菌同預防流感症狀有一定作用，唔食認真「走寶」，最多食完飲番杯暖牛奶，口氣？No Way。
- 補充劑量
唔少香港人都有服維他命C補充劑習慣，但現時仍未有足夠醫學研究證實有效預防感冒，而一粒維他命丸包含300~500mg維他命C，比成年人一日攝取量多出幾倍，即係話大家要適可而止，唔駛日日食。
- 按穴培元
除咗食療，按摩保健穴位都有助預防流感。每日按左右腳「足三里」(膝跟下3寸)10分鐘，可增強免疫力，另外按左右腳的「三陰交」(內足踝上3吋)3分鐘，屬肝、脾、腎三經交會穴，可提升元氣同免疫力。
