【解密】抗流感9大誤區
H1N1甲型流感恐襲細路，幼園小學驚變疫區，門診爆棚，細蚊變晒口罩黨，網上民間抗疫法寶大洗版，真假難分，主場一次過拆解9大誤區，秒殺謬論﹗
- 流感即係感冒？
感冒罪魁禍首係鼻病毒，症狀源自人體嘅自體免疫反應；流感係由流感病毒引致嘅急性呼吸道疾病，病徵由受病毒感染所致，流感唔可以當感冒醫﹗
- 醫流感食抗生素？
抗生素專門對付細菌感染，對由病毒引致嘅流感唔Work，除非中招後出現細菌感染如喉嚨發炎、肺炎等，食錯藥隨時有副作用。
- 打流感針有免疫金牌？
H1N1病毒基因變異，削弱疫苗保護力，而接種4-6個月後效力亦會打折，但都係嗰句，有打有保佑﹗
- 乞嚏冇個點會係流感？
美國疾病管制局統計，感染H1N1，9成發燒、 84%咳、61%喉嚨痛，想知有冇中招？日日探熱量體溫。
- 焗一身汗快啲退燒？
有樣嘢叫無科學根據，厚被厚衫會令身體散唔到熱，減慢退燒，醒目做法係用溫水抹身、飲多啲水，幫助散熱。
- 維他命C抗流感？
暫時未有足夠客觀證據證實，食維他命C有效預防或治療流感，反而英國有研究發現馬蹄含「荸薺英」，可以抑制流感病毒。
- 軟禁你等如保護你?
遊樂場、圖書館係撒毒黑點，但唔代表要軟禁子女，紫外線含維他命D，係提升免疫力嘅秘密武器，不妨嘆少陣冷氣，同陽光玩遊戲啦。
- 人係唯一播毒途徑？
H1N1有名你叫豬流感，病毒除咗人傳人，仲會豬傳人，要用攝氏70度以上高溫徹底煮熟豬肉，尤其係內臟。
- 換牙刷防再度感染？
病毒低溫潮濕環境淨係可以短暫存活幾小時，換言之牙刷播毒機會唔高，只要將牙刷洗乾淨，豎起吹乾淨就冇問題﹗
