「大寒」殺到 唔識補好易老﹗

唔講你一定唔知，聽日係大寒，即係乜？枉你話自己係中國人…大寒係二十四節氣入面壓軸一個，理論上係全年(農曆)最凍嘅一日，所謂唔補好易老，一個唔遺意壯漢變虧仔就唔抵，事不宜遲，醒你防寒三招，幫你平安過渡羊年大寒﹗

 1. 下身咪凍親‧足浴加棵大葱浸

大寒千祈千祈要注意腰以下部位嘅保暖，咪亂諗，醫師話寒氣容易由腳底入滲，切忌上身蒸鬆糕，下身賣涼粉，除咗著鞋要著襪，黑絲、打底褲出動，建議臨瞓前用熱水泡腳，認真啲，不妨摘兩棵大葱加料浸腳，據說可得通陽妙效。

2. 飲食淡口味‧葷素得宜夾啱Key

食肉獸唔駛愁，唔係要你冇啖好食，係循序漸進食清啲，為立春交接做準備，羊肉、牛肉有助補充高蛋白，必食﹗為免補過龍，不妨伴蘿白、白菜，幫助消化，補而不膩，虛寒體質宜加生薑、辣椒、茴香、肉桂等溫熱配料烹調，中和蘿白、白菜寒性，食完包你褸都著少件﹗

★驅寒食呢啲：蘿蔔燜羊、消寒糯米飯、白胡椒豬肚湯、生薑紅糖蕃薯糖水

3.育陰+護陽‧識食一定食黑色

大寒最易捐陽氣，養生先要養腎，呢日正正係養腎嘅黃金期，以下5種黑色食材係補腎珍品；黑芝麻抗氧補腎，黑木耳清理腸胃、黑棗補腎養胃、黑米健脾暖肝、黑豆利水解毒，食多啲唔止增強禦寒能力，仲可以提升免疫力同新陳代謝，甚至有「夏病冬治」奇效﹗

★養腎撚手菜：栗子燜紅棗、蘋果白背黑木耳黑豆瘦肉湯、枸杞紅棗茶