任天堂轉型求存！自己搞遊戲角色3D電影

遊戲機生產商任天堂早前賣咗美國棒球隊西雅圖水手嘅多數股份，套現幾百億日圓，正打算用呢筆錢投資電影業，謀求成為新嘅增長引擎。任天堂以前都試過授權電影公司製作佢哋遊戲角色嘅動畫，例如膾炙人口嘅《超級馬里奧》同《寵物小精靈》，不過自己落手落腳製作就真係第一次。

社長君島達己向《朝日新聞》透露，任天堂期望盡可能自己製作電影，計劃開設電影部門，而電影會瞄準全球市場，目標2至3年後推出第一部，好可能係全球知名遊戲角色嘅3D電影，然後再賣埋影碟。公司發言人若江誠亦向外國傳媒證實，任天堂唔單止會繼續授權出面公司製作遊戲角色嘅電影，仲會出資自己拍，同埋參與多啲製作過程。

其實任天堂背後嘅盤算唔難理解，辛辛苦苦度出嚟嘅遊戲角色大受歡迎，可以話係重要資產，正所謂肥水不流別人田，點解唔自己賺埋票房嗰部分？話唔定可以幫返遊戲市場。更何況賴以起家嘅遊戲機市場早就讓路畀手遊，日本出生率又咁低，任天堂喺截至3月底為止嘅上個財政年度，銷售額倒退8%，跌足7年，再唔發展新業務就恐怕死路一條。

上任社長岩田聰生前亦都致力推動任天堂轉型，其中一項計劃就係同日本環球影城合作，開個以任天堂遊戲角色為主題嘅景點。

來源:on.cc東網