上車借盡九成按揭？教你捉路

話說金管局年初再收緊按揭，最搶眼嘅莫過於將700萬以下物業按揭成數上限由七成收緊至六成，從此買樓門檻又高咗，首期「掹掹緊」嘅朋友頭都痕，發展商靈機一觸，連環推高成數按揭新招吸客，造足九成甚至九成半樓按，上車客當堂生猛晒﹗

但現實係，唔係個個新盤都為買家提供高成數按揭，想借多少少，其中一個方法係申請按揭保險計劃(按保)，當然冇咁大隻蛤乸，樓按袋袋平安，唔單止睇你搵幾多、做盛行，單位造價一樣有唔同，唔想失預算？以下竅門你要知：

1. 香港按揭證券有限公司基本上已經暫停八成以上按揭按保貸款，現時只剩番400萬元以下物業可申請最高九成按揭。
2. 申請九成按揭必須係首次置業，想買多層俾阿爸阿媽做孝順仔？除非第一層已經供滿，否則九成按揭「諗多咗」。
3. 買家供款同入息比率唔可以超過 45%，舉例每個月人工2萬，供樓唔多過9千，仲要經過壓力測試，即係話用現時按揭利率加多3厘後嘅息率計算，每月供款支出唔會超過入息嘅60%至合格﹗
4. 買家有固定收入係關鍵因素，糧單、稅單證明唔少得。

換言之，若閣下從事Freelance，收入按Job計，或者係保險、地產代理從業員，入息以底薪加佣金計算，即使薪高但糧唔準，銀行審批都會揸得較緊，同白領批到嘅按揭成數隨時相差一成，建議呢類人士首期預鬆啲，計啱條數，有心入巿唔怕遲喎。