【元朗加映】「楓」靡大棠打卡全攻略

2015-10-20 2759 Views 大棠, 紅葉

冬風起，全城「追楓者」蠢蠢欲動，引頸以待紅葉落索的時候，Facebook勢將掀起一番壯烈洗版﹗

「追楓」新手應該從何入手？正路有美加日韓團，唔正路嘅有連洪永城都未去過嘅北韓紅葉之旅。可能我香港仔性格啦，幾千銀搭飛機票買秋色絕無意義，其實優質賞楓勝地本土一樣有，首選元朗大棠，性價比超班﹗

每年秋冬，大棠潮拜者何其多，但唔係人人可以直睹楓姿，唔想行程失手，小弟現在過你幾招。話說紅葉最快11月中變色，12月「楓」華正茂，一月係last call，但今年天氣不似預期，天文台秋冬季預報氣溫偏高，意味紅葉轉色有機會延期，難怪12月只見橙葉、黃葉，未現「紅」潮，建議刨熟漁護署網站「紅葉情報」，失手機率大減。筆者每年見唔少「追楓族」山長水遠踩入大棠自然教育徑，現場至發現貨不對辦，說好的紅葉呢？傻豬，紅葉主要分佈喺大棠山道，燒烤場至吉慶橋間嘅車道最密集，隨意搵個角度，就地潮拍冇難度，推post前提提你，此楓不同彼楓，土產「紅楓」屬楓香樹葉，同加拿大國旗嘅Maple唔同品種，用正名tag圖，夠晒霸氣。