【將軍澳加映】騎乘新潮點 「單車友」有得揀

早前電影《破風》旋風襲港，單車熱吹到嚟將軍澳？是咁的，政府目標將香港打造成「單車之城」，耗資逾11億興建嘅香港單車館公園舊年底新鮮開放，作為「牛下女車神」李慧詩御用備戰基地，設施新、Pro、齊係基本嘢，唔夠潮點出到位？諗到嘅大草地、緩跑徑有，連估佢唔到嘅攀登牆、X-game場都有，真係忍唔住要講句：點止單車咁簡單？話說呢度起緊條接連藍田嘅跨海單車徑，將軍澳段搶閘開放，用家激讚路面闊，彎位少，隨路附送無敵大海景，無論你係新手或老手，獨行俠定合家歡「自駕遊」，一樣過癮。恭喜﹗以後「單車友」有得揀﹗