法基師叔明點你—新春開運實戰篇

年廿七去買桔，年廿八洗邋遢，新正頭可以做啲乜？上頭炷香、拜太歲、拜車公，猴年趨吉避凶路路通，作為一個真‧香港人，貪方便絕對合情合法合理。

Too simple sometimes naive﹗須知道運勢攸關，神唔可以亂求，佛唔可以hea拜，唔跟規矩分分鐘出事，為咗你嘅福祉，主場出面請大師教路，跪求開運法寶，各位觀眾，登登登凳，法基師叔駕到﹗

點你「頭炷香」

上到頭炷香，全年旺氣成雙。我一直有個迷思：咩係「真‧頭炷香」？

每年初一都有大批善信趕去黃大仙祠，好似夏蕙BB咁，時辰到拔足狂奔爭入廟上香，攞個頭彩，係咪第一個喺寺廟上香先叫得頭炷香？實情頭炷香唔同頭啖湯，只要係年初一子時上嘅香，都係頭炷香，一樣咁神心。

點你「接財神」

新正頭財神下凡，梗有一個喺左近，接財神有咩禁忌？

除咗頭炷香，大年初一有樣嘢一樣係必做，就是接財神，老黎嘢冇人嫌多，商場財神傳單，接﹗有財神嘜頭嘅揮春，接﹗披住財神衫嘅唔理高矮肥瘦，接﹗接財神只有一個大原則—來者不拒，唔理好醜，多啲嚟密啲手﹗

點你「轉風車」

可能我鬼仔性格啦，風車向左轉、向右轉有分別咩？

覺得舊年順風順水，就順時針轉keep住行好運。相反諸事不順，就逆時針轉，求否極泰來。難度最高係上年唔夠好又衰唔晒，點解救？先嚟個順時針轉，再講句「百無禁忌」，好運壞運化解話咁易。

點你「靚桃花」

桃花年年買，但未見好姻緣？典解嘅？典解嘅？

想招好桃花，先去花市順時針兜個圈，睇勻咁多檔，邊棵合眼緣買邊棵，記得一定要自己找數，自己捧返屋企，如果你棵桃花放到初七都咁省鏡，恭喜﹗姻緣等緊你。買桃花要完整一棵，折開一支一支想靈都難。