靚太朝聖新場 逛街巿優雅過High Tea

那些年，一條濕滑嘅街巿路，一個粗心大意嘅師奶…從此我高富帥字典入面，街巿等如煉獄。(悲劇發生過程經創傷自我保護機制從肇事者記憶中永久刪除)直至一個機緣巧合，有幸造訪肥媽主場、位於小西灣嘅摩登靚街巿，眼鏡碎當堂一地都係。

介紹返，此場正名「本灣巿場」，領展去年斥資2,500萬大翻新，順手改寫香港街巿嘅定義，話俾我哋呢類少入街巿嘅大鄉里知，原來買餸可以係享受嘅一種。皆因呢度以異國Market為靈感，加入仿老街巿裝潢，配合鮮艷色調同暖光色溫，撞出懷舊玩味，儼如置身G.O.D.X香港歷史博物館，加上間隔分明，地方企理過唔少SuperMarket，印象分無得輸。

所謂鹹魚青菜各有所愛，豬肉檔、魚檔、菜檔基本嘢以外，仲引入專賣外國蔬果、日韓食物同熟食攤檔，再加分﹗以前入街巿絕對係人性的考驗，主婦sssss為煲靚盪、煮餐好餸，為捕獲筍貨、搶新鮮料無所不用其極，就算街坊麻雀腳都冇面俾。入到嚟呢度完全唔同，除咗可以享用鎮店之寶——全港首創視像螢幕實時隔空買活雞系統i-Chicken，仲可以潮用八達通找數，原來血拼可以咁鬼Free。

最令我拍案驚奇嘅係，電台有DJ，網台有Web J，呢度有「街巿DJ」，一班口齒伶俐嘅年青人everyday現場為你廣播是日激安筍貨，好似上個禮拜六金奇異果一打盛惠廿個大洋，我雖然唔知價，但同場識食友人大嗌貨真價筍，梗係唔執輸排埋一份。最抵讚係DJ落足嘴頭現場報導奇異果有幾奇異，唔買都學到嘢，可能喺呢度雅致嘅氛圍下，特別能夠展現人性本善，向來弱肉強食嘅街巿如今匯聚斯文人，有興趣就埋嚟揀、埋嚟排隊，靚太造訪絕對可以保持儀態矜持。

講到呢度，你一定以為呢度個價好很貴，非也﹗全靠背後有班勤力嘅格價專員，做埋你嗰份。