上車從來不易

依家有唔少新樓愈起愈細，並且一個又一個既豪華劏房盤出現，這個現象嚴格嚟講，係供求因素所致。百物騰貴，包括建築成本上漲，在商言商，發展商好難做到Lump Sum平，又夠大，又美輪美奐嘅新樓，所以為咗迎合這批上車客，將價就貨在所難免。起細一點，成本低一點，訂價可以相宜一點，亦未必係一件壞事，起碼令到上車族容易一點入市。

早前有位社會名人大談年輕人上車之道，建議有意上車的後生仔女去少點日本旅行，睇少點戲，儲返一筆首期，最後惹來不少回響。各讀者就算鬧我Mi Mi都係咁話，就算每月慳到3,000蚊，都唔知要儲幾耐至夠首期，但可以肯定，如果後生仔女完全無儲錢習慣，明明可以同屋企人住，為左「自由」又話出嚟租屋住，又或者鍾意乜就買乜，成日話要享受人生，結果唔好話買樓上車，好多時成為入不敷支既「月光族」，所以先不談儲首期，大原則都係要努力工作，努力儲錢。

我諗除非係含住條金鎖匙出世，買樓上車從來唔係一件容易嘅事，上一代何嘗不是要知慳識檢，應使則使，應慳則慳，才可買到人生第一層樓。當然，你可以話樓價確實仍然好高，但社會就係咁現實，睇下你荷包有幾多實力。現時政府積極賣地起樓，以增加供應來滿足需求，所以如果連首期都仲差一大截，就算到時樓價跌幾多都唔關你事。