入市心魔 VS 美國息魔

講左咁耐，吹左咁多年，美國終於自2006年起第一次加息，有人話係加息周期開始，又有人話加一加啫，睇定一點。不過，美國加息就塵埃落定，但香港銀行幾時至會跟住加，或者跟唔跟都無人可以答到你。

最近有個熟客介紹左佢個朋友我識，佢係專業人士，份工都算穩定，現時同屋企人住，但佢話出年要結婚，見依家都儲到筆首期，想搵樓上車，係有實際需要既用家，但佢擔心加息之後個樓價會跌，搞到個心情好忐忑。

我同佢講，依家銀行按揭要經過壓力測試，見你供唔起都唔幫你做按揭，始終租樓住唔係唔好，唔使好似買層樓咁大包袱，但你想深一層，與其交租幫人供樓，既然能力許可，幫自己供樓，心理上點計都係較划算，再唔係當係儲錢。講笑咁講，間屋係自己既，想掛幅牆畫，打口釘入牆都可以自己話事，租客就諗都唔使諗了。

其實，要買樓或者賣樓無疑需要一定既勇氣，尤其係第一次買樓既客，但係我最唔鍾意那一味得把口講，個市升，又話怕高追，到個市跌，又話怕買貴既人。計我話，買唔起既，唔好諗咁多，儲返本錢才決定。買得起，加上有需要，我建議不妨趁個市靜返少少，行動最實際，撇開心魔，四周圍睇下樓，睇啱邊個合心水既盤，大膽還下價，話唔定有業主見你有誠意，而且又急於放盤，隨時可能執到平貨。樓市往往有上有落，唔會永遠升或者永遠跌，但放長遠去睇，磚頭始終有價就真既。