升市入 還是跌市入

雖則話二手業主開始減價，但依家樓價仲係高企，我Mi Mi做咗呢行咁耐，都覺得磚頭唔平，但香港地肯賣、肯買，你開個價都要有人肯接至可以成刁(Deal)，成交到既就係「市價」，合乎自由經濟市場原則，依家啲辣招其實係扭曲市場之舉，要樓價回落或者正常返，最王道既應該係從供應著手。

恕我直言，我識得唔少自怨自艾嘅無殼蝸牛，唔夠錢冇得講，但有好多唔係資金短缺，有啲後生仔女嘅父母樂意助其一臂之力，但問題嚟喇，就係個市升，又怕買貴，個市跌，又怕越跌越深，怕會買錯，搞到最後都係上唔到車。

俗語有話：寧買當頭起，莫買當頭跌，但其實只要有實際需要，升市或跌市都係入市時。可能你會話我Mi Mi 「Hard Sell」，但事實係冇人有能知未來的水晶球，如果有實際需要，你可以忍一陣，但唔應該忍一世，否則就會錯過擁有自己安樂窩嘅機會。需知道買樓係有一定風險，但個市旺，點解個業主要平俾你，可能個市靜少少，對於置業初哥可能都係入市機會，不妨趁依家多點睇樓，做定功課。

喺度都想奉勸有意上車嘅你，除非老豆剩落大把，否則必須要努力工作唔好揮霍，如果你是月光族，我建議你放棄入市。莫將「這些機會不是屬於我的」成為口頭禪，反而應該鼓勵自己「機會留畀有準備……入市嘅人」﹗