窗台，駛乜驚？醒你增值法寶

近年樓盤「奇則」老是常出現，客廳、睡房都梗有一個窗台喺左近，對於呢門建築設計，有人話佢阻碇唔等駛，有人嫌實用性低…「硬食」窗台？No Way﹗只要腦筋急轉彎，施展改裝魔法，將窗台嚟個大翻身，一次過解決空間同收納問題。

以主人房為例，如果窗台四正闊落，又位處睡床左、右兩邊位，可以考慮訂造地台牀，將矮身窗台延伸成地台，部份牀架晾喺窗台上面，慳番唔少地板與地台之間嘅空位，即時變身隱形抽屜，一舉兩得﹗

若閣下自問神級「煲劇王」，窗台咁啱又喺床尾位，建議裝個迷你電視櫃，托番部24吋Smart TV，話咁易打造私人影院，天寒地凍獨留被竇睇《Running Man》又得，攬住另一半翻煲《來自星星的你》又得，得咗﹗年終慳番唔少戲飛錢﹗

至於客房，窗台面積一般比較的骰，建議將窗台改裝成功能枱，只要訂造較窗台伸展大約20厘米嘅伸縮式書枱或者化妝枱，唔驚「頂腳」之餘，窗台仲成為採光好幫手，俾機會你朝朝同天然光玩遊戲，慳電又環保，化個妝都更得心應手。

唔想勞師動眾？一樣有計﹗買塊自由組合嘅變型坐墊，加個窗台專用小茶几，屋企即時多咗個Coffee Corner，一邊細閱《Vogue》，一邊呷口Double Macchiato，享受百分百home-made寫意品味。

講到底，只要識玩「空間偽術」，「閉翳」都變成「優勢」，慢慢你會發現屋企個窗台唔再可惡，有時仲幾鬼可愛。

柏宇設計有限公司

項目設計師Jodie Yau