落錯車慘過上錯車？

早幾年政府好努力推地，但一時三刻仍難解樓價急升燃眉之急。隨著時間過去，該批地皮既樓盤供應陸續到位，而被我哋代理喻為「世界盤」、「大茶飯」、全港首幅限呎地皮上興建嘅「世宙」亦推出市場，睇埋近期樓價走勢，以供應來穩定樓價的措施似乎已見少少成效。

早幾日睇報紙，記者街訪一位劉姓先生，佢話廿年前賣左觀塘間樓，諗住等個價跌返啲就買過第二間，但一路都入唔到，搞到租樓租左咁多年。其實呢啲例子，Mi Mi都見唔少，你話有啲客早年移民賣左間樓，點知回流香港，跟住買唔返，但呢啲都叫為勢所逼，最慘就係一班成日覺得個市會跌，間自住樓住得好地地，都走去放左間樓等個市跌，我成日都勸這類客換樓就無問題，賣走就風險高，加上遲遲唔入返市，問題就嚟啦，咁多年樓價升多跌少，賣左自住間樓等跌，個市唔跌，之後想入返就好難，除非肯認輸啦。

係香港地，上車確實唔容易，但有能力上車既應該趁後生入市，因為有能力可以慢慢供，唔好話一買樓就要買啲又大又靚既單位，否則有排都唔使旨意上到車，應該按部就班。從來住大屋嘅人，第一間樓都未必係佢哋既dream house，但無第一間，點會有第二間、第三間，以及有能力換到一間真正既dream house呢？ 老土啲講，買上車樓唔會錯得去邊，最多都只係買貴左，既然自住，最多咪當交租，如果樓價升上去，更加可以當儲錢。

最後都係那句，除非迫不得意，否則千祈唔好沽左自住樓﹗