5句話教你一Take過「鋤租」
租金連跌幾個月，一直處置業生物鏈底層嘅小租客，終於有返啲Say。同業主續約減租有如同港女談情，除咗理智與感情兼備，仲要識捉心態，袋實呢5條金句，鋤租「和理非非」又不失霸氣。
- 「租金指數跌咗半成啦，你咁貼個巿冇『奶油』唔知嘅？」
睇報紙最大功能係「拋書包」，討價還價事半功倍，用客觀數據令業主明白，世界變，出面周圍造緊大減價，仲企硬？你醒吓啦﹗
- 「幾千個入伙單位殺到嚟，點同批新貨爭客拗手瓜？你懂的。」
掌握巿場供求等如摸清包租公個底，鋤價成功率倍升，用官方數字話過佢知，香港地平靚正租盤周地都係，唔減？搵鬼租你層舊樓咩。
- 「轉租客蝕租、蝕佣，隨時要俾錢執過間屋，我係你做生不如做熟。」
作為一個進擊的租客，不妨業主上身，從對方利益出發(至少表面上係)，客觀分析唔續租俾你佢一樣冇so，機會成本呢啲嘢，好死嘅啫…(大前題係你make sure自己係個真‧好客)
- 「我每個月準時交租，間屋有甩漏自己攪掂，呢啲好客邊度搵？」
硬道理講完，就要嚟軟功，好似氹女友咁，舉引事實證明自己有幾一往情深，希望對方珍惜你，維繫呢段關係。
- 「我唔租﹗」(配合冇尾音X無奈眼神)
若然你用齊上述4句死「螺」都傾唔掂數，係時候出終極一招—「以退為進」﹗原理好似買嘢講價捉心理，須知道業主同港女嘅共通點係吊高嚟賣，當一直以為食硬你嘅佢突如其來「被分手」，一半機會會軟化減租挽留你，淨番嗰半係佢反客為主送你一程。