【元朗加映】錦田，有太多牛奶味

早前五中全會閉幕，最轟動嘅莫過於一孩政策鬆綁，「阿爺」落order，國內同胞可以生多個，先天下之憂嘅香港仔即刻關注到奶粉供求問題。無他嘅，牛奶係全宇宙哺乳類動物嘅生命之源，有研究話，牛奶消耗量同一個國家夠唔夠發達，甚至國民攞諾貝爾獎機率攸關。換言之，飲奶個人會醒啲，大前題係奶嘅quality。

近年來自北海道嘅數字奶大行其道，邊個話外國嘅月亮特別圓？牛奶貴在新鮮，識得飲一定去農場搵，呢陣「初榨」風味來自錦田。

位處大帽山山腳嘅隱世農場鮮奶，顧名思義，賣點係「農場」同「鮮奶」，聽行咗山幾十年嘅陳伯講，呢個場有三十幾年歷史，話說當年有個如假包換嘅牧場，有乳牛班底坐陣，每日出產鮮奶，近年生產線回歸祖國，牛牛北上，但每日繼續新鮮供應，招牌風味有得留低，後尾老闆索性做埋小食檔，久而久之成為行山友同車友補給站兼小弟放假morning drive一大誘因，行山X牛奶派對，補身健體一條龍﹗

鮮奶必試全脂(嚴重怕肥可以揀低脂、脫脂)，奶脂醇厚，口感最細膩濃稠，「嗗」一聲吞落肚，仲留低滿頰餘香，名符其實奶有奶味。「甜粉」首推薑汁撞奶，亮點係「即叫即撞」，鮮奶配老薑，撞出轟烈層次，其他甜品如燉奶、芒果布甸一樣係「即日鮮」，唔擺過夜，啱晒一眾sugar baby。

倘閣下似小弟唔嗜甜，建議飲奶前「柯打」(order)碗餐蛋麵，味道其次，哥就係愛嗰陣反樸歸真嘅鄉郊味。既然遠道而嚟，臨走不妨買包草慰勞一班駐場公關「羊咩咩」，順便喚醒你失落嘅童真，或者買番支牛乳潤膚霜做手信，咪話我唔提你，老闆貼咗張告示：人手不足，唔係星期六日、公眾假期，恕不招呼﹗