【必學】7招職場求生術

每年3月、4月都喺業績期，今年好多行業「見紅」，蝕錢新聞日日有，減薪裁員消息滿天飛。人事顧問教你7招自保求生秘技，喺腦細面前搶分，淡市洪流下力保飯碗﹗

第1招：腦細讀心術

好員工被裁機會自然少。但喺每個腦細對「好員工」嘅定義都唔同，有啲要員工「做牛做馬」，最好做足24小時。但有腦細講求「效率」，要求員工放工彈閘，咪嘥燈油火蠟。所以要識睇腦細眉頭眼額，適當時候做適當事，先至「襟撈」。

第2招：叢林法則 強者生存

好多人以為做「Mr. Nice」面面俱圓，萬一出事，同事未必幫手，但都唔會踩多腳。Too simple, sometimes naive﹗無腦細會因為你人緣好唔炒你。職場如戰場，淡市更加要當自己喺叢林中嘅猛獸，強者生存，懂得突圍而出，要對公司有實際貢獻，先可以贏得人人認同。

第3招：語言藝術 Say no有竅門

向腦細反映工作太多，要有技巧。舉個例，腦細扔給你額外工作，與其黑口黑面投訴，不如試試反問：「我手頭上已有兩項工作，邊個項目較緊急？」巧妙地反映實況；又或者想反對腦細時提議：「我有個新想法，成功機會可能較大。」記得控制情緒同表情，幾憤怒都要冷靜，否則火星撞地球，隨時講BYE BYE。

第4招：正能量神功

腦細最忌員工蜚短流長，是非做人情，當公司業績低迷時，員工喺另一邊長嗟短嘆，聽到都火起，未裁員都即時炒咗你先。如果公司流傳裁員消息，千萬別三五成群、議論紛紛，趁機會幫手安撫同事，人消極、你積極，搏命工作搶分。

第5招：不斷升呢 增加「彈性」

裁員後腦細最擔心份工邊個做，如果你具「彈性功能」，能身兼多職，會計、文書、宣傳、掃地「通殺」，精通多國語言，留低機會自然高。所以平日記得「升呢」，專長越多，被裁機會越低。

第6招：「露臉」政治學

腦細對員工考勤，往往靠「印象流」，你多支持公司活動，投入公司文化，自然有分加。人事顧問指出，經營困難時，腦細傾向留下積極參與企業活動嘅「好公民」。科技發達，公司活動已提升至「互聯網+」層次，平日喺通訊群組都唔好做「死魚」，遇腦細發言，幾唔得閒都咪齋出Emoji，點都加兩粒字，搏留個好印象。

第7招：謹慎言行 步步為營

辦公室耳目眾多，言行固然要謹慎，就連上網、發電郵，都要諗過度過。現代監察系統日新月異，上過嘅網站、甚至打粒字都有跡可尋。以為用手機無事？公司WIFI一樣追蹤到。所以辦公時辦公，唔好玩Facbook、炒股票、睇娛聞，求職更加喺死罪。即使《潮樓主場》咁出色嘅網站，都喺放工先慢慢睇啦。