特色牆 窩居「攪氣氛」高手

香港地寸金呎土，窩居「的骰」唔代表要犠牲格調，如何不費周章、唔駛勞師動眾升格家居佈局？一幅特色牆(Feature Wall)足以化腐朽為神奇。

近年香港人愈益注重生活品味，潮室潮居強調「Less is more」之餘，亦崇尚「Godis in the details」，難怪從細節入手嘅特色牆大行其道，唔少戶主謝絕純白單調四壁，以牆身充當畫紙，為愛居畫龍點睛。

特色牆設計各適其適，主流做法乃揀選範圍相對細、但處焦點位置如電視櫃、梳化、床頭嘅牆身「著墨」，其設計空間頗大，單係物料已經花款眾多，最方便靈活莫過於牆身貼上畫布、掛畫、牆貼等，貶吓眼將藍天白雲、布拉格、愛琴海融入家中，新婚夫婦不妨訂製婚照牆畫，打造港式浪漫滿屋。

若嫌平面牆畫唔夠格調？可考慮鋪砌工藝玻璃，為家居打造通透感與華麗氣派，或以文化石(以水泥、沙粒、陶粒等加工成裝飾建材)提升牆身立體感，營造歐陸園野或復古氛圍。對於講求成本效益嘅朋友，油漆乃美化牆身「平、靚、正」捷徑，用強烈對比色撞出個性，輕鬆為安樂窩踢走鬱悶，添加點點玩味。