Top Sales真係無樣睇？

常有人問我Mi Mi：「咩人先適合做代理？要好識說話？靚仔靚女有著數？」

無疑，代理屬銷售行業，有台型、口齒伶俐都係優勢，但係咪必要呢？Mi Mi自己都係「入得廚房，出得廳堂」，但卻認為唔一定。

新加盟我旗下的Ivan仔就是個好例子。單睇Ivan的樣子絕對稱不上「醒目」，肥頭耷耳，樣子敦厚，說話語調緩慢，像個老師多過代理。事實又再證明「以貌取人，失諸子羽」(Mi Mi都有兩滴墨水)。Ivan加入不到一個月，就已經成功開到張租單，總算好開始，之後數月仲接連促成數宗買賣，可惜最後與「最佳新人」的獎項擦肩而過(輸給「豪宅組」新人一個馬鼻)，但成績已喜出望外。

看Ivan帶點憨厚的樣子，外人很難明白他的立足之道，而Mi Mi我當然明啦。有日Ivan同一班同事到分行附近的酒樓飲茶，看到他開心地和點心嬸嬸、開茶侍應打招呼，部長更偷偷免了我們茶介時，大家亦察覺到他於短短數月間，已經同附近的街坊建立良好關係，打好成功基礎。

Ivan勝在「兩種力」，一係親和力，笑容可掬，幾乎同所有人都傾得埋，好易贏取信任；更重要係「勤力」，甫加入就熟讀附近屋苑資料，由座向、設施、交通，甚至有咩好食都瞭如指掌，而且落力call客、sell客，每遇到有客人發問題，無論有無幫趁都盡心解答…就是憑這些老行尊不時提醒我要謹記的基本功，Ivan的代理生涯有最好的開始。

真正成功的代理，賣的從來不單只是樓，而是服務，更是建立互信的關係。