比足佣 服務好

「Mi Mi，再減多啲佣得唔得呀？」望住客戶一臉期待，我惟有暫時把「唔得」兩個字收回肚中。

「減佣」，係地產代理深痛惡絕的兩個字(僅次於「免佣」)，因為減佣即代表收入減少，等同於你返工，無情情被扣人工，但工作沒有少。一般減佣都是客戶要求，亦有代理為促成交易，主動提供「甜頭」，例如業主「企硬」唔肯降價，代理於是忍痛「割肉餵鷹」，絕對係「損己利人」。

網上好多聲音將「減佣」講到天經地義，理由係代理係買樓過程中作用不大，甚至質疑這行業存在的需要。我又拋下書包，聽過「存在即合理」未？一個行業能生存咁耐一定有供求，係買樓搵樓的過程中，由最初資料搜集，到帶客睇樓，到講解、溝通、議價、查冊、簽合同、收樓等等…全部代理「一腳踢」，有時仲要搵埋裝修、搬屋、按揭同律師，工作多籮籮。

面對主動要求減佣的客戶，Mi Mi一般都不會直接說不，都會睇下大市，客人背景、樓盤價格作考慮，但有一件事是確定的，就是畀足佣的客會有些特殊待遇…

「收哥，最近有個業主急讓，減成一成，你有無興趣睇睇？」電話另一邊的係我的熟客仔「收租哥」，人稱「收哥」。收哥今年不過40歲左右，就已經有幾層樓收租，佢最厲害的地方除左眼光準、數口精，最重要係從來無拖佣減佣，所以我一有筍盤，第一時間就通知佢。

唔好怪我偏心，這是人之常情，以心比心，兩個老細，一個拖糧，一個薪高糧準，你會幫邊個打工先？