樓價升定跌？近8成人估跌
樓價都跌左一排，仲會跌幾多？仲會跌幾耐？真係「God knows」。但香港人點諗就好容易知道。友站GoHome.com.hk今日就公布左「2016年上半年香港房地產市場前景調查」的結果，係網上訪問近2,000名市民，發現有近9成人認為現時香港樓價過高，較2015年下半年的調查結果少4個百分點；此外，有77%人士認為2016上半年樓價會持續回落。結果反映左香港人對樓價下行的殷切冀盼。
友站已經唔係第一次進行呢類調查，上一次調查針對港人點睇2015年下半年樓市，大部分受訪者認為樓市會持續上升，甚至有5成人認為政府應「加辣」。但事移世易，今次調查已有超過7成港人認為香港樓市處於下行周期，但仍然有超過55%港人認為政府不應該調整或取消「辣招」；約36%港人認為樓價跌幅達25%或以上，政府才應該取消「辣招」。半年就「華麗轉身」，民意真係好難捉摸。
大部分受訪者認為樓價有回落趨勢，但跌幾多先會入市？近1成人士表示若樓價下調6-10%會考慮入市，更有超過3成人士表示下調11-20%先至會考慮入市。由此可見，價格回落的確有刺激市民有置業意欲的作用。莫非新年後真係會出現樓市「小陽春」？